Эрүүл мэндийн даатгалын үндэсний зөвлөлийн зургаадугаар сарын 28-ны хуралдаанаар ЭМДҮЗ-ийн тогтоолуудад өөрчлөлт оруулсан бөгөөд эрүүл мэндийн байгууллагад олгож байгаа санхүүжилтийн тарифын талаарх ЭМДҮЗ-ийн 01 дүгээр тогтоолд орсон өөрчлөлтийн талаарх мэдээллийг бид өмнө нь нийтэлсэн /https://moh.gov.mn/news/6527/ билээ.Энэ удаа ЭМДҮЗ-ийн 05 болон 02 дугаар тогтоолд орсон өөрчлөлтийг танилцуулж байна.
ЭМДҮЗ-ийн анхан шатны тусламж үйлчилгээний гүйцэтгэлтэй холбоотой 2022 оны 05 дугаар тогтоолд дараах өөрчлөлтийг оруулж анхан шатны тусламж, үйлчилгээний санхүүжилтийг боловсронгуй болголоо.
1. Засаг захиргаа, нутаг дэвсгэрийн нэгж, түүний удирдлагын тухай хуулийн дагуу байгуулагдсан цөөн хүн амтай сум, тосгоны эрүүл мэндийн төвийн хэвийн үйл ажиллагааг хангаж, алслагдсан бүс нутаг буй иргэдэд анхан шатны тусламж, үйлчилгээг авах боломжийг дэмжлээ.
2. Мөн сум, тосгоны эрүүл мэндийн төвд ажиллаж буй эмч, мэргэжилтнүүд, ажилчдын үндсэн цалинг нэмэгдүүлэх бодлогыг баримталж, тусламж, үйлчилгээний жагсаалтыг өргөжүүлж, тарифыг нэмэгдүүллээ.
3. Эрүүл мэндийн даатгалын тухай хуулийн 9.1.9-д заасан оношилгоо, шинжилгээ, гэрээр үзүүлэх тусламж, үйлчилгээ, зарим сэргээн засах, өдрийн эмчилгээний тарифыг инфляцын түвшинтэй уялдуулан нэмэгдүүлж, оношилгоо, шинжилгээний нэр төрлийг өргөжүүллээ.
ЭМДҮЗ-ийн 2022 оны 02 дугаар тогтоолоор баталсан журамд нэмэлт сонгон шалгаруулалт зарлах нөхцөлийг заасан боловч нэмэлт сонгон шалгаруулалтыг хэрхэн зохион байгуулах талаар нарийвчилсан зохицуулалт байхгүй байсан тул үүнтэй холбогдох зохицуулалтыг журамд нэмэлтээр оруулав.
Эрүүл мэндийн даатгалын сангаас санхүүжилт авах даатгалын гэрээ байгуулсан эрүүл мэндийн байгууллагууд шинэ технологи нутагшуулж, өмнө нь үзүүлж байгаагүй тусламж үйлчилгээ шинээр нэвтрүүлсэн тохиолдолд даатгалаас санхүүжилт авах нэмэлт сонгон шалгаруулалтыг хялбаршуулж зөвхөн хоёрдугаар үе шатнаас зохион байгуулахаар болсон.
