Эрүүл мэнд, спортын яам нь Эрүүл мэндийн даатгалын тухай хууль батлагдан өнгөрсөн оны 7дугаар сарын 01-ээс эхлэн мөрдөж эхэлсэнтэй холбогдуулан Нийгмийн даатгалын ерөнхий газрын дэргэдэх Эрүүл мэндийн даатгалын газартай хамтран эрүүл мэндийн даатгалын сангаас зардлын төлбөрийг нь хариуцах эрүүл мэндийн тусламж, үйлчилгээний багцад орох тусламж үйлчилгээний жагсаалт, өртөг, зардлын тооцоо, судалгааг үе шаттай хийсээр байна.
Энэ хүрээнд “Эрүүл мэндийн даатгалын тогтолцоог бэхжүүлэх нь” Техник туслалцааны төслийн хүрээнд эрүүл мэндийн даатгалын болон эмнэлгийн мэргэжилтнүүдэд тусламж үйлчилгээний өртөг тооцох арга зүйн сургалтыг цувралаар зохион байгуулсан.
Төслийн багтай хамтран өнгрсөн сарын сүүлчээр “Эмнэлгийн тусламж үйлчилгээний өртөг тооцох” сэдэвт хоёр өдрийн сургалтыг II, III шатлалын эмнэлгүүдийн эдийн засагч нарын чадавхийг сайжруулах, бэхжүүлэх зорилгоор эрүүл мэндийн тусламж, үйлчилгээний өртгийг дээрээс доош ба доороос дээш тооцох аргачлалыг хэлэлцэж, тодорхой өвчний тохиолдлын өртгийг тооцоолон амжилттай зохион байгуулсан байна.
Сургалтанд ЭМСЯ-ны Стратегийн бодлого, төлөвлөлтийн газрын даргын үүрэг гүйцэтгэгч Р.Оюунханд, СБТГ-ын Эрүүл мэндийн санхүүжилтийн бодлого төлөвлөлт хариуцсан мэргэжилтэн О.Батбаяр, СЭЗХ-ийн Анхан шатны тусламж үйлчилгээний төсвийн төлөвлөлт, хэрэгжилтийн зохицуулалт хариуцсан мэргэжилтэн О.Баяржаргал, “Эрүүл мэндийн даатгалын тогтолцоог бэхжүүлэх нь” GFA зөвлөх багийн ахлагч Аарон Влаакман, төслийн зөвлөх Б. Нансалмаа болон ЭМХТ, УХТЭ, УГТЭ, ХӨСҮТ, ГССҮТ, ХСҮТ, СЭМҮТ, АӨСҮТ, ЦССҮТ, НЭМХ, ЭСҮТ, Хан-Уул ЭМТ, Өргөө амаржих газар, Хүрээ амаржих газар зэрэг эрүүл мэндийн байгууллагуудын төлөөлөл оролцсон аж.
