Дархлаажуулалтын тухай хуульд 2023 онд нэмэлт өөрчлөлт оруулж, заавал хийх дархлаажуулалтад А вируст гепатит, пневмококк, хүний папиллома вирус (ХПВ)-ийн халдварын эсрэг сэргийлэх тарилгыг нэмсэн. Улмаар Засгийн газрын 2023 оны 472 дугаар тогтоолоор Дархлаажуулалтын үндэсний товлолыг шинэчлэн баталж, өнөөдрийн байдлаар хүүхдийг төрснөөс эхлэн 15 нас хүртэл 13 халдварын эсрэг 9 төрлийн вакцинаар дархлаажуулж байна.Шинэчлэгдэн батлагдсан товлолын дагуу ХПВ-ийн халдварыг эсрэг дархлаажуулалтыг Монгол Улс 2024 онд нэвтрүүлж эхэлсэн ба товлолын дагуу хүйс харгалзахгүйгээр 11 настай хүүхдийг дархлаажуулж байна.
ДЭМБ-аас шинэ вакцин нэвтрүүлсэн улс, орныг вакцин нэвтрүүлсний дараах үнэлгээг хийхийг зөвлөмж болгодог бөгөөд Монгол Улс ХПВ-ийн эсрэг вакцин нэвтрүүлсний дараах үнэлгээг дархлаажуулалтын хөтөлбөрийн үнэлгээтэй нэгтгэн 2026 оны 05 дугаар сард зохион байгууллаа. Үнэлгээний бэлтгэл ажлын хүрээнд цахимаар холбогдох мэдээллүүдийг танилцуулах уулзалтыг 2026 оны 05 дугаар сарын 18-20-ны өдрүүдэд зохион байгуулсан ба 2026 оны 05 дугаар сарын 22-27-ны өдрүүдэд үндэсний түвшинд болон сонгогдсон 4 аймаг, 2 дүүрэг, 2 төрөх эмнэлэгт ДЭМБ, НҮБХС-ийн хөндлөнгийн үнэлгээний багтай хамтран газар дээр нь очиж үнэлгээг хийв.
Үнэлгээний урьдчилсан үр дүнг танилцуулах хурал 2026 оны 05 дугаар сарын 29-ний өдөр Эрүүл мэндийн яаман дээр зохион байгуулагдсан бөгөөд үнэлгээнээс гарсан үр, дүн, зөвлөмжийн талаар холбогдох байгууллагын төлөөллүүд саналаа илэрхийлж, хэлэлцүүлэг өрнүүлэв.
