Эрүүл мэндийн сайд Э.Батшугар өнөөдөр Дэлхийн банкны Зүүн Ази, Номхон далайн бүсийн Эрүүл мэнд, хүний хөгжлийн асуудал хариуцсан захирал Карин Бреденкамп, Дэлхийн банкны Монгол Улсыг хариуцсан менежер бөгөөд Суурин төлөөлөгч Таехюн Ли болон холбогдох албаны төлөөллийг хүлээн авч уулзлаа.
Уулзалтын эхэнд Эрүүл мэндийн сайд Э.Батшугар Дэлхийн банкнаас Монгол Улсын эрүүл мэндийн салбарт хэрэгжүүлж ирсэн төсөл, хөтөлбөр, олон жилийн хамтын ажиллагаа, түншлэлд талархал илэрхийлэв. Тэрбээр КОВИД-19 цар тахлын үед хэрэгжүүлсэн “Монгол Улсад КОВИД-19 халдвараас урьдчилан сэргийлэх, хариу арга хэмжээ авах, бэлэн байдлыг хангах” төсөл амжилттай хэрэгжиж, хүн амын эрүүл мэндийг хамгаалах, салбарын хариу арга хэмжээний чадавхыг бэхжүүлэхэд чухал хувь нэмэр оруулсныг онцоллоо.
.jpg)
Дэлхийн банкны Зүүн Ази, Номхон далайн бүсийн Эрүүл мэнд, хүний хөгжлийн асуудал хариуцсан захирал Карин Бреденкамп Монгол Улсын эрүүл мэндийн салбарт хэрэгжүүлж буй хамтын ажиллагаанд сэтгэл хангалуун байгаагаа илэрхийлж, Эрүүл мэндийн яамны зүгээс үзүүлж ирсэн дэмжлэг, хамтын ажиллагаанд талархал илэрхийлэв.
Мөн Дэлхийн банкны Монгол Улсыг хариуцсан менежер бөгөөд Суурин төлөөлөгч Таехюн Ли Монгол Улсын эрүүл мэндийн салбарын бодлого, шинэчлэлийг дэмжин цаашид үргэлжлүүлэн хамтран ажиллахад бэлэн байгаагаа илэрхийллээ.
Уулзалтын төгсгөлд талууд эрүүл мэндийн салбар дахь цаашдын хамтын ажиллагааны чиглэл, хэрэгжүүлэх боломжтой төсөл, арга хэмжээний талаар санал солилцлоо.
