Эрүүл мэндийн сайд С.Чинзориг АШУҮИС-ийн “Эрдмийн чуулган-66”-г угтан зохион байгуулсан “Үйлийн судалгаанд суурилсан хэлэлцүүлэг-сургалт”-ын нээлтэд оролцов. 
Тэрбээр хэлэлцүүлэг-сургалтын оролцогчдод хандаж хэлсэн үгэндээ эрүүл мэндийн салбарт анх удаа хэрэгжиж буй үйлчилгээний стандартын талаар “Эрүүл мэндийн сайдын алба авсныхаа дараа хийж хэрэгжүүлсэн ажлын минь нэг нь энэхүү “Эрүүл мэндийн үйлчилгээнд тавих шаардлага MNS7014:2023 бөгөөд эрүүл мэндийн салбарт анхны энэ стандарт өнгөрсөн оны долдугаар сараас хэрэгжиж эхэлсэн юм.
Манай салбарын үндсэн зорилгын нэг нь үйлчлүүлэгчийн хүлээлтэд нийцсэн тусламж үйлчилгээ үзүүлэх асуудал. Гэхдээ энэ асуудал олон жилийн турш орхигдож ирснийг иргэдийн дунд хийсэн сэтгэл ханамжийн судалгааны дүнгүүд харуулдаг. Удирдлагын академиас хийсэн судалгаагаар төрөөс үзүүлж байгаа эрүүл мэндийн үйлчилгээг иргэдээр 5 хүртэл оноогоор үнэлүүлэхэд дунджаар 2,3 оноо авсан байдаг.
Үйлчлүүлэгчийн хүлээлтэд нийцсэн тусламж үйлчилгээ гэдгийг ДЭМБ-аас “эрүүл мэндийн байдлыг сайжруулахтай холбоотойгоос бусад асуудлаар үйлчлүүлэгчийн зүй ёсны хүлээлтийг эрүүл мэндийн байгууллага, ажилтан хэрхэн хангаж байгаагаар үнэлнэ” гэсэн бол үйлчлүүлэгчийн зүй ёсны хүлээлт гэдэг нь түүнд хүн ёсоор хандах, эрүүл мэндтэй нь холбоотой шийдвэр гаргалтанд оролцуулах, нууцлалыг хадгалах, цаг алдалгүй шуурхай, чанартай үйлчлэх, хүссэн мэдээллийг нь энгийн ойлгомжтой байдлаар өгөх, тусламж үйлчилгээ авах эрүүл мэндийн байгууллага, мэргэжилтнийг сонгох боломжоор хангах зэрэг ордог.
Үйлчлүүлэгчийн сэтгэл ханамжид хамгийн ихээр сөргөөр нөлөөлдөг зүйл нь эрүүл мэндийн ажилтнуудын харилцаа хандлагатай холбоотой байдаг бөгөөд олон улсын судалгаанаас харахад эмнэлгийн тусламж үйлчилгээтэй холбоотой шүүхэд хандсан заргын 70 хувийг эмч, эмнэлгийн ажилтны харилцаа хандлагын доголдлоос үүссэн хэрэг эзэлдэг байна.
Манай улсын хувьд 2023 оны жилийн эцсийн байдлаар ЭМЯ, харьяа төрөлжсөн мэргэшлийн эмнэлэг, тусгай мэргэжлийн төвүүдэд иргэдээс ирсэн 5200 өргөдөл гомдлын 10 хувь нь эмч, мэргэжилтний харилцаа, хандлагатай холбоотой байсан. Ийм учраас шинээр батлагдсан үйлчилгээний стандартад үйлчлүүлэгчид анхаарлаа бүрэн хандуулж, мэндлэх, яриаг нь анхааралтай сонсох, мэргэжлийн үг хэллэг ашиглахгүй энгийн үгээр ойлгомжтой тайлбарлах, сэтгэл гарган үйлчлэх, ажилтан бүр хөтөч байх зэрэг энгийн хэрнээ орхигдуулдаг асуудлыг тусгасан юм.
Нөгөө талаас эмнэлгээр үйлчлүүлж буй иргэдэд хандсан тодорхой заалтуудыг ч тусгасан” хэмээн уг стандартын талаар нэлээд дэлгэрэнгүй мэдээллийг хэлэлцүүлэг сургалтад оролцогчдод өглөө.
Хот хөдөөгийн эрүүл мэндийн байгууллагын эмч, сувилагч, эмнэлгийн мэргэжилтнүүд, тэднийг бэлтгэдэг сургуулиудын багш нарын дунд хийсэн “Үйлийн судалгаа” /Action Research/-ны ач холбогдол, үр дүнг хуваалцах зорилготой уг хэлэлцүүлэгт анагаахын болон сувилахуйн мэргэжилтнүүд, АШУҮИС, МУИС, МУБИС-ийн эрдэмтэн судлаач, багш нар оролцож “Үйлийн судалгааг практикт ашиглахын ач тус”, “Судалгаанд чанарын аргыг ашиглах нь”, “Их сургуулийн эмнэлгүүдийн үйлчлүүлэгчдийн менежмент” илтгэлүүдийг сонсч хэлэлцүүлэг өрнүүлсэн.
.jpg)
