Эрүүл мэндийн сайд С.Чинзориг өнгөрсөн сарын 17-нд А/256 тоот тушаал гаргаж эрт илрүүлэх үзлэг, шинжилгээ, оношлогоог эрчимжүүлэх үүрэг өгсөн. Уг тушаалын хэрэгжилтийг хангахаар төрөлжсөн мэргэшлийн эмнэлгүүдийн эмч, эмнэлгийн мэргэжилтний хамтарсан багууд орон нутагт ажиллаж байгаа. Тэд иргэдийг халдварт болон халдварт бус өвчнөөс урьдчилан сэргийлэх үзлэг, шинжилгээ, оношлогоонд хамрагдалтыг нэмэгдүүлэх, орон нутгийн эрүүл мэндийн байгууллагуудад мэргэжил арга зүйн дэмжлэг үзүүлж, байгаа юм.
Улсын Хоёрдугаар Төв эмнэлгийн эмч нарын 15 хүний бүрэлдэхүүнтэй эхний ээлжийн баг Архангай, Өвөрхангай, Баянхонгорт ажиллахаар явсан. Өнгөрсөн бямба гаригт эмч нарыг Архангай аймгийн Эрдэнэмандал суманд ажиллаж байх үед утсаар холбогдож үзлэг, оношлогооны үйл ажиллагаа хэрхэн явагдаж байгаа талаар мэс заслын их эмч Э.Анхбаяраас тодрууллаа.
-Эрт илрүүлэх үзлэгт иргэдийн хамрагдалт, идэвх ямар байна вэ?
-Бид өнөөдөр Архангай аймгийн Эрдэнэмандал суманд ажиллаж байна. Орон нутгийн иргэдийн хувьд эрт илрүүлэгт идэвхтэй, сайн хамрагдаж байгаа. Өчигдөр 100 гаруй хүн үзсэн бол өнөөдөр өглөөнөөс эхлээд 80 орчим хүн үзсэн. Ихэвчлэн сумдад ажиллаж байгаа. Эндээс Тариат руу очих юм.
-Орон нутагт эрт илрүүлэх үзлэг, оношлогоо хийхэд шаардлагатай тоног төхөөрөмж хэр хангалттай байна?
-Манай эмч нарын баг зөөврийн дуран, рентген, лабораторитой явж байгаа учраас ясны сийрэгжилт, чихрийн шижин гэх мэт бүх төрлийн үзлэг хийж, зөвлөгөө өгөөд явж байгаа. Харин сумдад эмнэлгийн багаж хэрэгсэл дутмаг нь ажиглагдлаа. Зарим багаж хэрэгсэл байдаг ч хүний нөөц дутагдалтай юм. Иймд эмч нарыг чадавхижуулах ажлын байрны сургалт давхар хийж байна.
-Иргэдийн дунд ямар төрлийн өвчлөл илүү давамгайлж байна вэ?
-Шинжилгээгээр артерийн даралт ихсэлт болон хеликобактериар үүсгэгддэг улаан хоолойн сөөргөө зэрэг өвчлөл ходоодны дурангаар их илэрч байна.
-Хэдэн насныхан үзлэгт түлхүү хамрагдаж байна?
-Эрт илрүүлэх үзлэг, оношлогоонд улс даяар иргэдийг идэвхтэй хамрагдахыг уриалж байгаа. Тэр дагуу бид иргэдийг насны ангиллаар багц, багцаар нь үзлэг хийж, зөвлөгөө өгч байна. Мөн эрүүл мэндийн даатгалын ажилтан манай багт явж байгаа учир шимтгэлээ төлөөгүй иргэдийн асуудлыг газар дээр нь шийдээд үзлэг, оношлогоонд хамруулж байна.
-Танай баг Архангайн дараа аль аймагт ажиллах вэ?
-Бид Архангай аймагт ажиллаж дуусаад үргэлжлүүлэн Өвөрхангай, Баянхонгор аймагт нэг сарын хугацаанд ажиллах юм.
Эмч нарын баг аймаг, сум дундын эмнэлэгт газар дээр нь эрт илрүүлэг, урьдчилан сэргийлэх үзлэг, шинжилгээ хийж байгаа учир алслагдмал байршилд байгаа малчид хамрагдах боломж бүрдэж байна. Мөн зүрх судас, мэс засал, нарийн мэргэжлийн дотрын эмч нар сумын эмч, мэргэжилтнүүдэд мэргэжил арга зүйн зөвлөгөө өгч, зөвлөн туслах үйлчилгээ үзүүлж байгаа. Үүнээс гадна эрт илрүүлэг, үзлэг оношлогоонд ороод дараагийн шатны эмчилгээ, тусламж шаардлагатай иргэдийг УХТЭ-т эмчлэх боломжтой. Сүүлийн жилүүдэд халдварт бус өвчлөл нэмэгдэх хандлагатай байгаа тул зүрх судас, дотрын нарийн мэргэжлийн эмч бүрэлдэхүүнд явж байна. Иймд орон нутгийн иргэдийг эрт илрүүлэх үзлэг, оношлогоо шинжилгээнд идэвхтэй хамрагдахыг уриалж байна.
