Эрүүл мэндийн сайд С.Энхболдын зүгээс салбарын цахим шинэчлэлийг эхлүүлэх амлалтыг өгсөн билээ. Энэ хүрээнд тодорхой шийдвэрүүдийг гаргаж, Эрүүл мэндийн салбарыг цахимжуулах хөтөлбөрийг гарган хэрэгжүүлж байгаа юм. Энэхүү ажлыг Эрүүл мэндийн яамны холбогдох ажлын хэсэг болон харьяа агентлаг, эрүүл мэндийн байгууллагууд, Харилцаа холбоо, мэдээллийн технологийн газар, Үндэсний дата төв, Цахим эрүүл мэнд төслүүд төдийгүй програм хангамж үйлдвэрлэгч аж ахуй нэгжүүд хамтран хийж байна. Эрүүл мэндийн цахим шилжилтэд төрийн болон хувийн хэвшлийн бүх шатны эрүүл мэндийн байгууллагыг хамруулж, чанартай тусламж үйлчилгээ,шуурхай, хялбар байдлыг бэхжүүлэх, нотолгоонд суурилсан шийдвэр гарахад чиглэн ажиллах юм. Цаашид эрүүл мэндийн тусламж үйлчилгээг цахимжуулснаар, эрүүл мэндийн эрсдэлийг бууруулах, амьдралын чанарыг сайжруулахад бодитой үр нөлөө үзүүлнэ гэж салбарын мэргэжилтэнгүүд тооцож байна.
Эрүүл мэндийн өгөгдөл солилцооны нэгдсэн платформыг үндэсний мэдээлэл, технологийн энтерпрайз архитектурт уялдуулан хөгжүүлэх “Нэг хэл-Нэг стандарт” уриаг дэвшүүлэн програм хангамж хөгжүүлэх суурь шаардлага болох өгөгдлийн тайлбар толь бичгийг боловсруулж байна. Дэлхийн банкны санхүүжилттэй Цахим эрүүл мэнд төслийн үйл ажиллагааны үр дүнд, эрүүл мэндийн өгөгдөл, мэдээлэл, технологийн 24 стандартыг бий болгожээ. Эрүүл мэндийн салбарын санхүүжилтийн тогтолцооны шинэчлэлийг цахим суурьтай хийж, төр хувийн хэвшлийн эрүүл мэндийн байгууллагуудын өдөр тутмын үйл ажиллагааны бүртгэл, эрүүл мэндийн даатгалын сангаас санхүүжүүлэх үйл явцыг бодит цаг хугацаанд шилжүүлсэн. Эмийн үнийн хөнгөлөлт, Ковид-19 олон улсын эрүүл мэндийн гэрчилгээ, вакцины гэрчилгээ, дотоодын QR батламж, эмчийн магадалгааг Төрийн үйлчилгээний нэгдсэн цахим систем E-Mongolia, Түц машинаар дамжуулан иргэдэд олгож байна. Эрүүл мэндийн яам, Хөдөлмөр, нийгмийн хамгааллын яам, Харилцаа холбоо, мэдээлэл технологийн газрын хамтын ажиллагааны хүрээнд эмчийн үзлэгийн цаг захиалга, эмнэлзүйн лабораторийн шинжилгээний хариу, хөдөлмөрийн чадвар түр алдсаны, жирэмсний болон амаржсаны эмнэлгийн хуудас, цусны бүлгийн тодорхойлолт, эрүүл мэндийн даатгалын үйлчилгээг Төрийн мэдээлэл солилцооны Хур системд холбосон ба тун удахгүй E-Mongolia аппликэшнаар дамжуулан үйлчилгээнд гарах бэлтгэл ажлыг хангаад байна.
Мөн салбарын цахим шилжилт зорилтын хүрээнд Эрүүл мэндийн хөгжлийн төвөөс "Цахим шилжилт" арга хэмжээг зохион байгуулж, салбарын хүний нөөц, статистикийн бүртгэл мэдээлэл, магадлан итгэмжлэл зэрэг хариуцсан 6 чиг үүргийн үйл ажиллагааг цахим хэлбэрт шилжүүлсэн талаар танилцууллаа.
Уг үйл ажиллагаанд Эрүүл мэндийн сайд С.Энхболд, ЭМЯ-ны Төрийн нарийн бичгийн дарга Ц.Эрдэмбилэг, ЭМЯ-ны газар хэлтсийн дарга болон харьяа эмнэлгийн удирдлагууд, хамтарч ажилласан байгууллагууд болон Эрүүл мэндийн хөгжлийн төвийн хамт олон оролцов. Төрөөс Эрүүл мэндийн талаар баримтлах бодлого, Монгол Усын урт хугацааны хөгжлийн бодлого “Алсын хараа 2050”, Засгийн газрын 2020-2024 оны үйл ажиллагааны хөтөлбөрт төрийн үйлчилгээг үе шаттайгаар цахимжуулж, “Ухаалаг засаглал”, “Цахим засаглал”-ыг бий болгон авлигагүй, хүнд сурталгүй, сайн засаглалыг тогтоохоор ажиллаж байна.
