Сэтгэцийн Эрүүл Мэндийн Үндэсний Төв, Анагаахын Шинжлэх Ухааны Үндэсний Их Сургуулийн эмч, эрдэмтэдийн хамтран бүтээсэн “Шизофрени эмгэг ба түүний эмнэлзүйн хэлбэрүүдийн үед тохиолдох дерматоглификийн гол шинжүүд” сэдэвт судалгааны ажил нь Олон улсын нэр хүнд бүхий Эрдэм шинжилгээний сэтгүүл болох Public Library of Science (Plos one ) IF-2.740 (2019-2020) сэтгүүлд хэвлэгдлээ. Энэхүү Plos one эрдэм шинжилгээний сэтгүүл нь 200 гаруй судалгааны чиглэлээр дэлхийн 20000 гаруй судлаач нарыг холбосон эрдэм судлалын нотолгоо, шаардлага, ёс зүй өндөртэй сэтгүүл юм.Судлаач Н.Оюунчимэг, Ц.Алтансүх, Л.Насанцэнгэл, Ж.Сарантуяа нарын судалгаагаар шизофрени эмгэгтэй хүмүүс болон нийт хүн амын дунд хуруу болон алганы хээнд ялгаа байгаа эсэхийг тодорхойлохыг зорьсон.
Шизофрени эмгэгийн үед баруун гарын ядам хуруунд нуман хээ илрэх,А-В судлын тоо буурах, кататони хэлбэрийн шизофрени эмгэгийн үед илүү олон угалзан хээ илрэх, А-В судлын тоо ихсэх зэрэг дерматоглификийн олон нууцлаг байдлуудыг илрүүлэв. Судалгааны үр дүнгээс үзвэл дерматоглификийн шинжүүдийг шизофрени эмгэгийн оношлогооны хэрэглүүр болгон хэрэглэх боломжтойг нотлож байгаа ба цаашид эмнэлзүйд суурилсан судалгаануудыг хийх шаардлагатайг харууллаа.
