Монгол улсын 21 аймаг, нийслэлийн 8 дүүргийн 225 өрхийн эрүүл мэндийн төвийн 3000 гаруй эмч, сувилагч, мэргэжилтнүүд 2.4 сая иргэн буюу нийт хүн амын 70 хувьд эрүүл мэндийн анхан шатны тусламж үйлчилгээг үзүүлж байна. “Коронавируст халдвар (ковид-19) цар тахлын үед өрхийн эрүүл мэндийн төвийн үзүүлж буй тусламж үйлчилгээний өнөөгийн байдал тулгамдаж буй асуудал’’ зөвлөгөөн 13 дахь удаагаа ийнхүү зохион байгуулагдаж байна.
Энэхүү зөвлөгөөнийг Эрүүл мэндийн яам, Монголын өрхийн анагаах ухааны мэргэжилтнүүдийн холбоо хамтран зохион байгуулж байна. Цар тахлын үед өрхийн эрүүл мэндийн үзүүлж буй тусламж үйлчилгээ тулгамдаж буй асуудал зөвлөгөөн 2 өдөр үргэлжлэх юм. Өрхийн эрүүл мэндийн төв нь Эрүүл мэндийн сайдын 2017 оны 05 тоот тушаалаар баталсан гүйцэтгэлийн гэрээ болон тусламж үйлчилгээний багцын дагуу 35 төрлийн 328 эмнэлгийн, 17 нийгмийн эрүүл мэндийн тусламж үйлчилгээг үзүүлэхээр чармайн ажиллаж байгаа ч улс оронд Коронавирусийн цар тахал дэрдсэнээс хойш иргэдийг халдвараас сэргийлэх, коронавирусийн халдвар илрүүлэх шинжилгээ хийх, халдвар авсан 40,000 гаран иргэдийг гэрээр хянах, эмчлэх, хүндэрсэн тохиолдлыг эмнэлэгт хүргэх, тэдний ойрын болон дам хавьтлыг тогтоох, хянах, иргэдийг дархлаажуулалтанд хамруулах зэрэг ачааны хүндийг үүрэн ажиллаж байна. Үүний зэрэгцээ үндсэн тусламж үйлчилгээ болох жирэмсэн эх, нярай, болон хэвтрийн, ахмад настны эргэлт, халдварын бус зүрх судас, хоол боловсруулах, амьсгал, үе мөчний, хавдрын өвчтэй хүнд болон хүндэвтэр өвчний хяналт хоцрогдож, уг өвчнөөр иргэд хүндрэх асуудал ихсэж, гэр бүл төлөвлөлт, сүрьеэ өвчний эмчилгээ нэг тулгамдсан асуудал болсоор байна.
Мөн өрхийн эрүүл мэндийн төвийн хүний нөөцийн хүртээмж, нэн тулгамдсан асуудал болж байна. Иймээс цар тахлын үед өрхийн эрүүл мэндийн төвийн үндсэн тусламж үйлчилгээг хэрхэн чанартай, хүртээмжтэй, чирэгдэлгүй хүргэх, ялангуяа хоцрогдоод байгаа нийгмийн эрүүл мэндийн тусламж үйлчилгээг үзүүлэх болон халдварт болон халдварт бус өвчний эрт илрүүлгийн үзлэгийг хэрхэн зохион байгуулах, иргэдэд тусламж үйлчилгээг хэрхэн чирэгдэлгүй, хүртээмжтэй үзүүлэх талаар зөвлөлдөх, анхан шатны тусламжийн талаар төрөөс баримтлах бодлого шийдвэртэй танилцах, хэрэгжүүлэх, итгэмжлэл, өрхийн эмч нарыг мэргэжил дээшлүүлэх сургалт, эрүүл мэндийн даатгалын сангаас санхүүжүүлэх тусламж үйлчилгээг сайжруулах чиглэлээр хийгдэж байгаа үйл ажиллагааны талаар мэдээлэл солилцож, тулгамдаж буй асуудлаа ярилцаж хэрхэн шийдвэрлэх талаар зөвлөлдөх юм.
.jpg)
