“Вирүст хепатитийн оношилгоо, эмчилгээ” сэдэвт олон улсын давтан сургалтыг хоёр өдрийн турш Эрүүл мэнд, спортын яам, Халдварт өвчин судлалын үндэсний төв, /ХӨСҮТ/ АНУ-ын GLead Sciences компанитай хамтран Эрүүл мэнд спортын яамны “А” зааланд амжилттай зохион байгууллаа.
Сургалтад хамрагдсан ХӨСҮТ, Улсын I, II, III төв эмнэлэг, 21 аймаг, есөн дүүргийн нэгдсэн эмнэлэг, АШУҮИС, Сонгодо, Интермед, Грандмед Интерферон альфа зэрэг томоохон хувийн хэвшлийн эмнэлгийн гастроэнтерологи, халдвартын 130 гаруй эмч нарт гэрчилгээг нь Эрүүл мэнд спортын сайд Г.Шийлэгдамба өнөөдөр гардуулан өглөө. Энэ үеэр манай эмч нарт мэдлэг чадвар, туршлагаасаа харамгүй хуваалцсан эрдэмтэн судлаачиддаа талархалаа илэрхийлээд, 2020 он гэхэд Монгол Улсад элэгний өвчлөлгүй орон болох зорилтын эхлэл хэмээн онцолсон.
Уг сургалтад Эрүүл мэнд, спортын яамны халдвар, нян судлалын ерөнхий мэргэжилтэн академич П.Нямдаваа, дотрын ерөнхий мэргэжилтэн С.Наранцэцэг, Их Британи улсын Лондогийн Их сургуулийн профессор Европын элэг судлалын нийгэмлэгийн Удирдах зөвлөлийн Боловсролын зөвлөх Жефри Душейко, АНУ-ын Калифони дахь Станфордын Их сургуулийн элэг судлалын тэнхмийн эрхлэгч, вирүст хепатит ба элэгний хавдарын эмчилгээний чиглэлээр эмнэлзүйн судалгаа хөтөлбөрүүдийг удирддаг дэд профессор Миндие Х Нгуеэн зэрэг олон эрдэмтэн, судлаачид илтгэл тавьж хэлэлцүүлжээ.
