Нийслэлийн хэмжээнд өдгөө гурав дахь жилдээ зохион байгуулагдаж буй “Эрүүл иргэн аян-2020” үйл ажиллагаа өнөөдөр албан ёсоор эхэлж байна.Нийслэлийн иргэдийг эрүүл мэндийн төрөлжсөн нарийн мэргэжлийн үзлэг, оношилгоонд хамруулах зорилготой тус аяны нээлтэнд Эрүүл мэндийн сайд Д.Сарангэрэл, Нийслэлийн Эрүүл мэндийн газрын дарга Л.Төмөрбаатар болон дүүргийн ЗДТГ, Эрүүл мэндийн төвийн төлөөлөл оролцлоо.
НҮБ-ын төрөлжсөн байгууллагын хамтарсан багаас 2015-2016 онд хийсэн үнэлгээгээр манай хүн амын нийт нас баралтын шалтгааны 77 хувийг халдварт бус өвчлөл эзэлж байгааг тогтоожээ.
Мөн Засгийн газраас хэрэгжүүлсэн Халдварт өвчинтэй тэмцэх үндэсний хөтөлбөр, сүрьеэ, БЗДХ, ХДХВ/ДОХ-той тэмцэх, сэргийлэх үндэсний стратегийн хэрэгжилтийн үр дүнд халдварт өвчний тоо 2016 оноос хойш тогтмол буурч байгаа хэдий ч зарим халдварт өвчний тухайд ихсэх хандлагатай байсаар байна.
Үүний нэг нь иргэдийг эрүүл мэндийн урьдчилан сэргийлэх үзлэг, оношилгоо, эрт илрүүлэгт хамруулснаар зонхилон тохиолдох халдварт болон халдварт бус өвчнийг эрт үед нь оношлон эмчлэн, эрүүлжүүлэх зорилго бүхий “Эрүүл иргэн” аян юм. Энэ ажлын хүрээнд нийслэлийн есөн дүүргийн хороод, Өрхийн эрүүл мэндийн төвд төрөлжсөн нарийн мэргэжлийн 7-8 чиглэлийн эмч, эмнэлгийн мэргэжилтэн ажиллаж иргэдэд эрүүл мэндийн урьдчилан сэргийлэх үзлэг, оношилгоо хийх, зөвлөгөө өгөхөөс гадна өрхийн эмч, мэргэжилтэнг ажлын байран дээр мэргэжлийн чиглэлээр сургаж буй нь иргэд, олон нийт төдийгүй эмнэлгийн мэргэжилтнүүдийн талархлыг хүлээсэн билээ.
Аяны хүрээнд хүн амын дунд өвчлөл өндөр байгаа зүрх судас, хавдар, хүүхэд, мэдрэл, чих хамар хоолой, нүд болон бусад чиглэлээр үзлэг, оношилгоо хийхээс гадна улсын хэмжээнд зохион байгуулж буй “Тэмбүүг устгая” арга хэмжээ, сүрьеэгийн халдварыг бууруулах, “Элэг бүтэн Монгол” үндэсний хөтөлбөрийн хүрээнд багажийн болон лабораторийн оношилгоонууд хийгдэнэ.
