Эмгэг Судлалын Үндэсний төв нь “Жайка” Олон улсын байгууллагатай хамтран хэрэгжүүлж буй төслийн хүрээнд “Мэргэжлээс шалтгаалах уушгины эмгэгийн эрт үеийн оношилгооны чадавхийг сайжруулах” сэдэвт 2 дахь удаагийн сургалтыг тус төвд 2019 оны 06 дугаар сарын 25, 26, 27-ны өдрүүдэд явагдлаа.Сургалтанд Эмгэг судлалын үндэсний төвийн, 21 аймаг, нийслэлийн 9 дүүргийн нэгдсэн эмнэлгээс төлөөлж 34 эмгэг судлаач эмч, эс судлаач, эмгэг судлалын лабораторийн техникч, эмнэлгийн мэргэжилтнүүд хамрагдлаа.
Тус сургалтыг Япон улсаас хүрэлцэн ирсэн Анагаах ухааны доктор, профессор, эрдэмтэн багш Коүки Инай, Тошиаки Камей, Юкио Такешима нарын баг удирдан явууллаа.
Сургалтаар уул уурхай, барилгын салбар хөгжиж буй өнөө үед хөдөлмөрийн нөхцөлтэй уялдан үүсч буй уушгины эдгэшгүй эмгэг өвчнийг эрт үед нь оношлох, урьдчилан сэргийлэх зорилгоор түүн дотроо барилга, байгууламж, дулаалганд ашиглаж буй шилэн хөвөнгөөс үүдэлтэй мэргэжлээс шалтгаалах уушги тоосжих өвчний эмгэг жам, төрөл, уушигны тоосжилт болон эмгэг зүйн харилцан хамаарал, уушигны хавдар, мезотелиомын эмгэг судлалын оношилгооны арга, шинэ ололт амжилт, мэдлэгийг эзэмшиж, мөн агаарын бохирдолттой холбоотой амьсгалын замын үрэвсэлт өвчин тэдгээрийг хэрхэн ялгах оношилгооны чиглэлүүдээр сургалтыг зохион байгууллаа.
Энэхүү сургалтаар эмгэг судлалынхан оношилгооны талаар шинэ мэдлэгтэй болж, уушгины эмгэгийн эрт үеийн оношилгооны чадавх сайжрах, эмгэг судлалын салбар түүн дотроо эд, эс судлалын өнөөгийн тулгамдсан асуудлууд, тэдгээрийг хэрхэн шийдвэрлэх, цаашид энэхүү мэдлэг, мэдээллээ практикт буюу эмгэг судлалын тусламж, үйлчилгээнд нэвтрүүлэх, хэрэгжүүлэх зэрэг ач холбогдолтой сургалт боллоо.
