Монгол Улсын Их хурлын 2014 оны 57 дугаар тогтоолоор батлагдсан Төрөөс эмийн талаар баримтлах бодлогын 7.3.3-д “Импортыг орлох, зайлшгүй шаардлагатай эм, эмнэлгийн хэрэгслийг дотооддоо үйлдвэрлэхэд төрөөс дэмжлэг үзүүлэх” гэсэн заалт, УИХ-ын 2012 оны 37 дугаар тогтоолоор батлагдсан Засгийн газрын 2012-2016 оны үйл ажиллагааны мөрийн хөтөлбөрийн 183.1-д “Эм үйлдвэрлэлийн зохистой дадал (GМР) нэвтрүүлсэн үндэсний эмийн үйлдвэрүүдэд батламж олгоно” гэсэн заалт тусгагдсан.
Цомбо эмийн үйлдвэр нь ариун эмийн үйлдвэрлэлийн стандартын жишигт хүрсэн барилга, тоног төхөөрөмж, технологи бүхий дотоодын 100% хөрөнгө оруулалттайгаар 2005 онд байгуулагдсан.
Тус үйлдвэр нь 5мл болон 10мл тун шилтэй эмийн технологийг нэвтрүүлж, улсын эмийн бүртгэлд 25 нэр төрлийн бүтээгдэхүүнийг бүртгүүлэн зах зээлд нийлүүлж байна.
GMP-ийг нэвтрүүлэх ажлын хүрээнд барилга байгууламж, тоног төхөөрөмжийн шинэчлэлтэд 2,4 тэрбум төгрөгийн санхүүжилтийг үе шаттайгаар зарцуулсан ба 2008-2015 онд олон улсын зөвлөхүүдийн зөвлөмжийг авч ажилласан.
Цомбо фарм” ХХК чанарын хяналтын алба нь Эмийн чанар, аюулгүй байдалд онцгой анхаарч хими болон микробиологийн гэсэн хоёр лабораторитай анх 2008 онд итгэмжлэгдэж хувийн хэвшлийн лабораториудаас 2 дахь итгэмжлэгдсэн лаборатори болж байсан. Нийтдээ 4 удаа итгэмжлэлийн хугацааг сунгуулсан ба итгэмжлэгдсэн лаборатори болоод 10 гаруй жил үйл ажиллагаа явуулж байна.
“Цомбо фарм” ХХК-ийн эмийн үйлдвэрийн “Эм үйлдвэрлэлийн зохистой дадал”-ын шаардлага хангасныг үндэслэн бага эзэлхүүнтэй тарилгын уусмал эмийн хэлбэрт Эрүүл мэндийн сайдын 2019 оны А/175 дугаар тушаалаар “Эм үйлдвэрлэлийн зохистой дадал”-ын батламж олгохоор шийдвэрлэсэн болно.
Ингэснээр “Цомбо фарм” ХХК-ийн эмийн үйлдвэр нь “Эм үйлдвэрлэлийн зохистой дадал”-ын шаардлага хангасан 5 дах эмийн үйлдвэр боллоо.
