Эрүүл мэндийн байгууллагын үндсэн гол зорилго нь үйлчлүүлэгчдийн эрэлт хэрэгцээ, тэдний сэтгэл ханамжид нийцсэн тусламж үйлчилгээг үзүүлэх явдал юм. Иймээс ч алсын болон ойрын хугацаанд хэрэгжүүлэхээр төлөвлөсөн үйл ажиллагааны зорилгод тусламж үйлчилгээний чанар, үр дүн, аюулгүй байдлын талаар тусгасан байдаг. Мөн 2018-2022 онд хэрэгжүүлэх эрүүл мэндийн тусламж үйлчилгээний чанар-аюулгүй байдлыг сайжруулах стратегийг байгууллага бүр хэрэгжүүлэн ажиллаж байна. Гэвч эрүүл мэндийн удирдах ажилтнуудын чанар, аюулгүй байдлыг удирдаж, зохион байгуулах ойлголт, мэдлэг хангалтгүй байгаа юм.
Иймд олон улсын эмч нарын өдрийг угтаж, Эрүүл мэндийн чанарын холбоотой хамтран “Эрүүл мэндийн тусламж үйлчилгээний чанар-аюулгүй байдал” сэдэвт сургалтыг зохион байгууллаа. Сургалтанд төр, хувийн хэвшлийн эрүүл мэндийн байгууллагуудын 90 гаруй дарга, удирдлага, мэргэжилтнүүд оролцож, Эрүүл мэндийн чанарын холбооны гишүүн Л.Баярцэцэг, Э.Тунгалаг нар сургагч багшаар ажиллав.
Сургалтаар чанарын тухай үндсэн ойлголт, чанар сайжруулах арга, хэрэгслүүд, чанарын төлөвлөлт, эрсдэл, аюулгүй байдлын тухай үзэл баримтлал, чанарын урамшуулал, чанарын хяналт үнэлгээний талаар онолын мэдээллийг сонсч, байнга тохиолдож байдаг тусламж үйлчилгээний чанартай холбоотой асуудлыг хэрхэн шийдвэрлэх талаар харилцан ярилцлаа.
Энэхүү сургалт нь удирдлагуудын чанар, аюулгүй байдлын тухай ойлголт мэдлэгийг сайжруулж, тусламж үйлчилгээний удирдлага зохион байгуулалтанд шинэ арга барилыг нэвтрүүлэх, ингэснээр хамгийн гол зорилго болох үйлчлүүлэгчдийн эрэлт хэрэгцээ, сэтгэл ханамжид нийцсэн тусламж үйлчилгээг чанар үр дүнтэй үзүүлэхэд ихээхэн ач холбогдолтой сайхан сургалт боллоо гэж оролцогчид дүгнээд, өндөр сэтгэгдэлтэй байна.
