ЭМЯ-ны ШУТ-ийн зөвлөл хуралдлаа. ХСҮТ дээр хэрэгжүүлсэн судлаач УУ-ны доктор, клиникийн профессор Л.Төмөрбаатарын удирдсан
“Молекул генетик оношилгооны дэвшилтэт технологийг хорт хавдрын оношилгоо, эмчилгээнд нэвтрүүлэх нь” (2014-2017 он) сэдэвт цөм, технологийн төслийн үр дүнг хэлэлцлээ.
ХСҮТ-ийн судалгааны баг нь төслийн хүрээнд молекул генетикийн дэвшилтэт технологи, арга аргачлалуудыг хавдрын оношилгоо эмчилгээнд нэвтрүүлж, гадагшаа урсах эдийн засгийн үргүй зардлыг бууруулах зорилгоор цөм, технологийн төслийг БСШУСЯ, ЭМЯ, ШУТС-ийн санхүүжилтээр амжилттай хэрэгжүүллээ.
Төслийн хүрээнд молекул генетик оношилгооны иж бүрэн лабораторийг байгуулж, эдийн биобанк, мэдээллийн санг үүсгэн байгуулснаар эрдэм шинжилгээ судалгааны ажил тасралтгүй хийгдэх боломжийг бий болголоо. Шинээр нэвтрүүлсэн технологиудын стандарт 6, стандарт ажиллагааны заавар 17 боловсруулан батлуулж үйл ажиллагаандаа нэвтрүүллээ. Судалгаанд нийт ЭМЯ, ШУТС-аас нийт 1 тэрбум төгрөг зарцуулсан бөгөөд давхардсан тоогоор 2000 гаруй өвчтөн молекул генетикийн шинжилгээнд хамрагдсан. Судалгаагаар судалгаанд хамрагдсан өвчтөнүүдийн оншилгооны зардлыг тооцоход 2,9 тэрбум төгрөгийн өртөг бүхий шинжилгээ хийгдэх байсныг судлан гаргасан байна. Молекул генетикийн дэвшилтэт технологи, арга аргачлалуудыг хавдрын оношилгоо эмчилгээнд нэвтрүүлж, гадагшаа урсах эдийн засгийн үргүй зардлыг бууруулах зорилгодоо хүрч амжилттай төслийн үр дүнг хүлээлгэн өглөө.
