ГЕРОНТОЛОГИЙН ҮНДЭСНИЙ ТӨВӨӨС “ЭРҮҮЛ НАСЖИЛТ, НАСТНЫ ЭРҮҮЛ МЭНД” ҮНДЭСНИЙ ЧУУЛГА УУЛЗАЛТ ЗОХИОН БАЙГУУЛЛАА

Геронтологийн үндэсний төв, Эрүүл мэндийн яам хамтран “Эрүүл насжилт, настны эрүүл мэнд” үндэсний чуулга уулзалтыг 2018 оны 10 дугаар сарын 24-ны өдөр Эрүүл Мэндийн Яамны “Б” танхимд зохион байгуулж, үйл ажиллагааны нээлтэнд Эрүүл мэндийн яамны Төрийн нарийн бичгийн дарга Э.Содномжамц, Бодлого төлөвлөлтийн газрын дарга Р.Оюунханд, Эмнэлгийн тусламжийн  газрын дарга Б.Баттүвшин, Геронтологийн үндэсний төвийн ерөнхий захирал Р.Хишигжаргал нар оролцлоо. Чуулга уулзалтын үеэр “Эрүүл насжилт, настны эрүүл мэнд” үндэсний  хөтөлбөрийн нэгдүгээр шатны хэрэгжилтийн тайланг танилцуулж, II шатны хөтөлбөрийн хэрэгжилтийг эрчимжүүлэх, салбар хоорондын уялдаа холбоог сайжруулах зорилгоор Хөдөлмөр, халамжийн үйлчилгээний ерөнхий газар, Монголын ахмадын холбоо,  Эрүүл мэндийн яамны харъяа төвүүд, Эрүүл мэндийн хөгжлийн төв, Аймаг, Нийслэлийн эрүүл мэндийн газрын дарга, ахмадын асуудал хариуцсан мэргэжилтэн, ахмадын эмч, нийгмийн бодлогын хэлтсийн дарга, ахмадын хороон дарга нар оролцсон өргөн цар хүрээтэй зохион байгууллаа. Үйл ажиллагааны хүрээнд “Эрүүл насжилт, настны эрүүл мэнд” үндэсний хөтөлбөрийн нэгдүгээр шатны хэрэгжилтийн тайланг танилцуулж, хэрэгжилтийн явцад тулгамдаж буй асуудлууд болон цаашид анхаарч ажиллах заавар, зөвлөгөөг тусган санал солилцож нээлттэй хэлэлцлээ.
Чуулга уулзалтын үеэр Геронтологийн үндэсний төвөөс жил бүр уламжлал болгон зохион байгуулдаг “Настанд ээлтэй өрхийн эрүүл мэндийн төв” шалгаруулж, Орхон аймгийн “ ЭНХЖИН МАНДАРИВАА ӨЭМТ”  шалгарч өргөмжлөл мөнгөн шагналаар шагнав. Мөн  Геронтологи гериатрын салбарт олон жил үр бүтээлтэй ажилласан Орхон аймгийн БОЭТ-ийн настны Х.Мэндхүү, Хэнтий аймгийн Нэгдсэн эмнэлгийн настны А.Мөнхзаяа нарыг Монголын ахмадын холбооны “Хүндэт тэмдэг”-ээр, Чингэлтэй дүүргийн настны эмч М.Мөнхжаргал, УБТЗ-ын настны эмч М.Цэрэнжав нарыг Нийслэлийн ахмадын хорооны “Хүндэт тэмдэг”-ээр тус тус шагнаж  урамшуулав. Үйл ажиллагаанд 21 аймаг 9 дүүргийн 120  гаран төлөөлөгч оролцлоо.