“Нийтийг хамарсан химийн ослын үеийн нийгмийн эрүүл мэндийн менежментийн чадавхийг бүрдүүлэх”

Дэлхийн эрүүл мэндийн байгууллага, Олон улсын химийн бодисын менежментийн стратеги (SAICM)-ийн санхүүжилтээр Эрүүл мэндийн яам, Уул уурхайн аврах анги, Нийгмийн эрүүл мэндийн үндэсний төв хамтран хэрэгжүүлж буй “Нийтийг хамарсан химийн ослын үеийн нийгмийн эрүүл мэндийн менежментийн чадавхийг бүрдүүлэх” олон улсын төслийн удирдах зөвлөлийн гишүүдийн хоёрдугаар хурлыг Налайх дүүрэг дэх Уул уурхайн аврах ангид зохион байгууллаа. Тус хурлыг Эрүүл мэндийн дэд сайд, төслийн удирдах зөвлөлийн дарга Л.Бямбасүрэн удирдан явууллаа.
 

 
“Нийтийг хамарсан химийн ослын үеийн нийгмийн эрүүл мэндийн менежментийн чадавхийг бүрдүүлэх” олон улсын төсөл нь химийн ослын үеийн нийгмийн эрүүл мэндийн онцгой байдлын бэлэн байдлыг хангахад эрх зүйн орчинг сайжруулах, тандалт мэдээллийн тогтолцоог боловсронгуй болгох, эмч мэргэжилтнүүдийг сургаж, дадлагажуулах, салбар дундын хамтын ажиллагааг сайжруулахад үйл ажиллагаагаа чиглүүлэн  ажилладаг.
Энэхүү хуралд Эрүүл Мэндийн Сайдын 2017 оны 09 сарын 19-ны өдрийн А/366 дугаар тушаалаар батлагдсан удирдах зөвлөлийн бүрэлдэхүүний дагуу ЭМЯ, УУХҮЯ, ХНХЯ, ОБЕГ, МХЕГ, ЗХЖШ, УУАА, НМХГ, НЭМҮТ, ХЯТҮТ, ДЭМБ, ШХА, МБУНДХ-ны нийт 21 мэргэжилтнүүд хамрагдлаа.
 

 
Тус хуралд НЭМҮТ-ийн ТЗШУА-ны дарга Р.Даваадорж төслийн хүрээнд 2018 оны 09 сарын 25-28-ны өдрүүдэд зохион байгуулагдсан “Уул уурхайн үйл ажиллагаатай холбоотой химийн ослын үед эрүүл мэндийн тусламж үйлчилгээ үзүүлэгчдийн чадавхийг сайжруулах” сэдэвт 4 өдрийн сургалтын ач холбогдол, үр дүнгийн талаар, НЭМҮТ-ийн Орчны эрүүл мэнд, хор судлалын лабораторийн химич Д.Баатарцол “Химийн ослын үеийн нийгмийн эрүүл мэндийн менежментийн чадавхийг бүрдүүлэх” сэдэвт интерактив сургалтын материалын агуулгын талаар, УУАА-ийн дарга хурандаа Г.Буянтогтох “Уул уурхайн салбарт ашиглагдаж буй химийн хорт бодисын ослын үеийн менежементийг боловсронгуй болгох, оролцогч талуудын чадавхийг бэхжүүлэх” сэдэвт ширээний дасгал сургуулилтын бэлтгэл ажлын талаар тус тус танилцуулав.
 

 
Төслийн удирдах зөвлөлийн гишүүд 2018 оны 11 сарын 15, 16-ны өдрүүдэд зохион байгуулагдах дасгал сургуулилтийн бэлтгэл ажил, материаллаг бааз болон Налайх дүүрэг дахь Уул уурхайн аврах ангийн үйл ажиллагаатай танилцсан.
Түүнчлэн энэхүү олон улсын төслийн хүрээнд цаашид хийх үйл ажиллагаа болон уул уурхайн үйл ажиллагаанаас үүдэлтэй химийн осол, хордлого, лабораторийн эмчилгээ, оношилгооны өнөөгийн нөхцөл байдлын талаар удирдах зөвлөлийн гишүүд санал солилцлоо.