Өнөөдөр Эрүүл мэндийн яам, Дэлхийн эрүүл мэндийн байгууллага хамтран 2018-2019 онд хэрэгжүүлэх техникийн хамтын ажиллагааны хөтөлбөрийн хэрэгжилт, 2020-2021 оны Хөтөлбөрийн төлөвлөлтийн талаар танилцуулах хурал болов.
Хуралд Эрүүл мэндийн дэд сайд Л.Бямбасүрэн, ЭМЯ-ны газар хэлтсийн дарга, холбогдох мэргэжилтнүүд, ДЭМБ-ын Суурин төлөөлөгчийн үүрэг гүйцэтгэгч Сергей Диордица, Суурин төлөөлөгчийн газрын хөтөлбөр хариуцсан ажилтнууд оролцлоо.
Хурлыг нээж Дэд сайд Л.Бямбасүрэн хэлсэн үгэндээ ЭМЯ, ДЭМБ-тай хамтран 2018-2019 онд 4 сая 165 мянган ам.долларын төсөв бүхий, нийт 20 хөтөлбөрийг хамтран хэрэгжүүлнэ. Эдгээр хөтөлбөрүүдийг хэрэгжүүлэх, 2020-2021 оны хөтөлбөрийн төлөвлөлт, түүний онцлогийн талаар танилцуулж, санал солилцох гэж байгаад ДЭМБ-ын Суурин төлөөлөгчийн газарт талархал илэрхийлээд, уг хөтөлбөрийг хэрэгжүүлэхэд хөтөлбөрийн категори, чиглэл бүрээр хариуцан ажиллах ЭМЯ-ны албан тушаалтнууд тодорхой хугацаанд уулзаж, хөтөлбөрийн хэрэгжилтийг эрчимжүүлэх чиглэлээр ажиллах зүйтэй талаар тэмдэглэн хэлэв.
Хурлын үеэр ДЭМБ-ын Суурин төлөөлөгчийн үүрэг гүйцэтгэгч Сергей Диордица 2018-2019 оны хөтөлбөрийн хэрэгжилтийн явц, онцлог, 2020-2021 оны Хөтөлбөрийн төлөвлөлтийн онцлог, ДЭМБ-ын 2019-2023 оны Үйл ажиллагааны ерөнхий хөтөлбөрийн төсөл, Монгол Улсын Засгийн газар – ДЭМБ-ын 2017-2021 оны хамтын ажиллагааны стратегийн тэргүүлэх чиглэлүүдийн талаар илтгэл тавьж, хуралд оролцогчид хари\лцан санал солилцож, хэлэлцүүлэг өрнүүлэв.
