Дэлхий даяар жил бүрийн 5 дугаар сарын 17-ны өдрийг "Цусны даралт ихсэлттэй тэмцэх дэлхийн өдөр" болгон тэмдэглэдэг бөгөөд энэ жил "Цусны даралт хянаж сурцгаая" уриан дор тэмдэглэж байна. Дэлхий дахинд жил бүр 18 сая хүн зүрх судасны өвчнөөр нас бардаг ба эдгээр нас баралтын талаас илүү буюу 9,4 сая нь цусны даралт ихсэлтээс үүдэлтэй байна. Тус арга хэмжээнд Эрүүл мэндийн яам, Нийслэлийн Эрүүл мэндийн газар, БГД, БЗД, СБД, СХД, ХУД, ЧД-ийн Эрүүл мэндийн төвүүд, Сонгдо, Интермед, Грандмед, Мөнгөн гүүр, Номун зэрэг хувийн хэвшлийн эрүүл мэндийн байгууллагууд оролцлоо. Энэ арга хэмжээний үеэр тус өдөрт зориулсан уралдаанд байр эзэлсэн 5 өрхийн эрүүл мэндийн төвд таван зуун мянгаас сая төгрөгний мөнгөн урамшуулал гардууллаа. Мөн өрхийн эмнэлгүүдэд даралт хэмжих орчин үеийн аппарат олголоо.
