Эрүүл мэндийн дэд сайд Л.Бямбасүрэн өнөөдөр Канадын Лаурел сангийн эмч, мэргэжилтнүүдийг хүлээн авч уулзлаа.
Тус сан нь 1988 онд байгуулагдсан, эрүүл мэндийн чиглэлээр үйл ажиллагаа явуулдаг сайн санааны байгууллага бөгөөд Эрүүл мэндийн яамтай 2015 онд Хамтран ажиллах санамж бичигт гарын үсэг зурснаар үйл ажиллагаагаа Монгол улсад эхлүүлсэн.
Канадын Лаурел сан нь өнөөдрийн байдлаар Улсын нэгдүгээр төв эмнэлэг, Хавдар судлалын үндэсний төв, Говь Алтай болон Архангай аймгийн Эрүүл мэндийн газрууд, Монголын нүдний эмч нарын нийгэмлэг зэрэг 6 байгууллагатай 5 жилийн хугацаатай хамтран ажиллах санамж бичиг байгуулан ажиллаж байна.
Санамж бичгийн хүрээнд нүдний болон хавдрын мэс заслын чиглэлээр боловсон хүчнийг чадавхжуулах, сургалт зохион байгуулах, шаардлагатай тоног төхөөрөмжөөр хангах чиглэлээр хамтран ажиллаж байна.
Дээрх хугацаанд сонгогдсон эрүүл мэндийн байгууллагуудын эмч мэргэжилтнүүдтэй хамтран давхардсан тоогоор 1800 гаруй хүнд нүдний үзлэг оношилгоо, 620 гаруй мэс засал эмчилгээ хийсэн. Үүнээс 570 хүнд орчин үеийн технологи болох Факоэмульсификацийн машин ашиглан болрын, 27 хүнд нүдний нөхөн сэргээх, 15 хүнд хялар засах мэс засал хийсэн байна. Түүнчлэн алслагдсан сумдын иргэдэд очиж 130 гаруй хүнд эмнэлгийн тусламж үйлчилгээ үзүүлсэн байна.
