“СЭТГЭЛИЙН МЯНГАН ҮЙЛС” нийгэмд үйлчлэх Төрийн бус байгууллага нь ҮНДЭСНИЙ СТАТИСТИКИЙН ХОРОО, ЦУС СЭЛБЭЛТ СУДЛАЛЫН ҮНДЭСНИЙ ТӨВ-тэй хамтран “Сар бүрийн 3-Цусаа бэлэглэх уламжлалт өдрийн” хүрээнд “СЭТГЭЛИЙН 1000 ДОНОР-3” аяны нээлтийг ЦССҮТ дээр амжилттай зохион байгууллаа.
Сайн дурын авлагагүй цусны донорын эгнээг өргөжүүлэх, хүн амын дунд донорын талаарх сургалт сурталчилгааг олон талт хэлбэрээр зохион явуулж, төрийн болон төрийн бус байгууллагууд, олон нийтийн оролцоог идэвхижүүлэх, аюулгүй цусны нөөцийг нэмэгдүүлэх, тогтмол хугацаанд цусаа бэлэглэгч доноруудыг алдаршуулах зорилготой энэхүү аян нь 3 дахь жилдээ зохион байгуулагдаж байгаад бөгөөд бүтэн сарын турш үргэлжлэх юм.
“Сэтгэлийн 1000 донор” аянг Монгол Улсын Хөдөлмөрийн баатар гавьяат тамирчин Х.Цагаанбаатар, О.Гүндэгмаа нарын үүсгэн байгуулсан “Хосбаатар” сан, “Аваргууд” Монголын чөлөөт бөхийн академи, “HANU” ХХК, “Өлзий намнан” ХХК дэмжин ажиллаж байна.
УИХ-ын Д.Гантулга нээлтийн арга хэмжээнд хүрэлцэн ирж баяр хүргэж амжилт хүссэн юм. Мөн Монгол Улсын Хөдөлмөрийн баатар, гавьяат тамирчин Х.Цагаанбаатар, П.Сэрдамба, Монгол Улсын гавьяат тамирчин О.Насанбурмаа, П.Орхон болон Монгол Улсын гавьяат жүжигчин Ч.Бат-Эрдэнэ, Соёлын тэргүүний ажилтан жүжигчин Д.Баттөмөр нарын урлаг, спортын алдартнууд оролцлоо.
Энэ өдөр “Бахархал 10” тэмдгээр донор Ш.Цэдэндамба, Г.Эрдэнэбат (Монгол Улсын гавьяат жүжигчин), “Бахархал 20” тэмдгээр донор Н.Мөнхбат, “Бахархал 30” тэмдгээр донор Ш.Пүрэвдорж, “Бахархал 40” тэмдгээр донор О.Оюунчимэг нарыг тус тус шагнаж, “Хүрэл донор”-оор донор Г.Гантөмөр, Р.Батхүү нарыг өргөмжлөв. Мөн Үндэсний статистикийн хорооны ажилтан Д.Ганзориг, Д.Баярмаа, Д.Анхзаяа нарыг МУЗН-ийн Тэргүүний залуу алтан медалиар шагнав.
