Монгол Улсын Засгийн Газар 2007 оноос эхлэн Люксембургийн Вант Улсын Засгийн Газар, НҮБ-ын Хүн амын сантай хамтран хэрэгжүүлж буй “Эх, нярайн тусламжинд зайн оношилгоо дэмжлэг болох” төсөл хоёр үе шаттай хэрэгжиж байгаа бөгөөд төгсгөлийн үе шат болох “Эх, нярайн эрүүл мэндийн тусламж, үйлчилгээнд шинэ техник, технологийг нутагшуулах нь” төсөл 2017-2019 онд хэрэгжих ба нийт төсөв 2 сая 800 ам.доллар юм.
Тус төслийг 2018 онд хэрэгжүүлэх үйл ажиллагааны төлөвлөгөөг хэлэлцэж, төсөвийг зохистой зарцуулах талаар Эрүүл мэндийн дэд сайд Л.Бямбасүрэнгээр ахлуулсан Удирдах хорооны хурлын гишүүд хуралдаж, 2018 оны үйл ажиллагааны төлөвлөгөөг санал нэгтэй баталлаа. 2018 онд хэрэгжүүлэх ажлын төлөвлөгөөнд Эх, хүүхэд, нөхөн үржихүйн эрүүл мэндийн үндэсний хөтөлбөрийг хэрэгжүүлэхэд дэмжлэг үзүүлэх, эх, нярайн тусламж, үйлчилгээний бодит өртөг тооцох аргачлалыг боловсруулах, эх барихын эмнэлзүйн ур чадварын лабораторийг ЭХЭМҮТ, АШУҮИС-ийн Сувилахуйн сургууль дээр нээх, эмч, эмнэлгийн мэргэжилтнүүдийг сургаж, дадлагажуулах зэрэг үйл ажиллагаанууд оржээ.
Эрүүл мэндийн дэд сайд Л.Бямбасүрэн хэлэхдээ Монгол Улсын эх, нярайн эрүүл мэндийг сайжруулж, Мянганы хөгжлийн зорилтод хүрэхэд хувь нэмрээ оруулсан төсөл болсныг илтгээд цаашид төслийг тогтвортой авч явж, нутагшуулахад Монгол улсын Засгийн Газар, Эрүүл мэндийн яам, холбогдох харъяа байгууллагууд онцгой анхаарна гэдгийг онцоллоо.
