Монгол улсын хэмжээнд 38 үндэсний эмийн үйлдвэр үйл ажиллагаа явуулж байгаагаас дуслын шингэн, тарилгын, шахмал эм, уламжлалт эм, биологийн идэвхт бүтээгдэхүүн үйлдвэрлэж байна. Эдгээр үйлдвэрүүд нь нийт 461 нэр төрлийн бүтээгдэхүүн үйлдвэрлэж байна.
Төрөөс эрүүл мэндийн талаар баримтлах бодлого, Засгийн газрын 2016-2020 оны үйл ажиллагааны мөрийн хөтөлбөрийг хэрэгжүүлэх төлөвлөгөө, ЭМЯ-ны 2017 оны үйл ажиллагааны төлөвлөгөөнд үндэсний эм, эмнэлгийн хэрэгслийн үйлдвэрлэлийг олон улсын түвшинд хүргэж, ургамал, амьтан, эрдсийн гаралтай уламжлалт эм, импортыг орлох зайлшгүй шаардлагатай эмийн үйлдвэрлэл, “Эм үйлдвэрлэлийн зохистой дадал” /GMP/-ийн түвшинд хүргэх, бүтээгдэхүүнийг экспортод гаргахад төрөөс дэмжлэг үзүүлэх талаар тусгагдсан.
Монгол улс 2005 онд анхны GMP үндэсний стандартыг боловсруулан баталсан бөгөөд 2011, 2014 онд шинэчлэн гарсан стандарт нь ДЭМБ-ын GMP удирдамжийн түвшинд боловсруулагдсан. Өнөөгийн байдлаар үндэсний GMP-ын стандартаар 2 эмийн үйлдвэр гэрчилгээ авсан, 5-6 эмийн үйлдвэр гэрчилгээ авах бэлтгэл ажлыг хангаад байна. Өнөөдрийн байдлаар 3 дахь үндэсний эмийн үйлдвэр болох Нахиа эмийн үйлдвэр “Эм үйлдвэрлэлийн зохистой дадал” /GMP/-ийн батламж авах шаардлагыг хангасан байна.
Эм, эмнэлгийн хэрэгслийн тухай хууль, ЭМС-ын 2013 оны 495-р тушаал “Эм үйлдвэрлэлийн зохистой дадлын батламж олгох журам”, ЭМЯ-ны дэргэдэх Хүний эмийн зөвлөлийн шийдвэр, ЭМС-ын 2017 оны А/492-р тушаалыг тус тус үндэслэн Нахиа эмийн үйлдвэрт “Эм үйлдвэрлэлийн зохистой дадал” /GMP/-ын батламж олгов. Төрөөс эрүүл мэндийн талаар баримтлах бодлого, Засгийн газрын 2016-2020 оны үйл ажиллагааны мөрийн хөтөлбөрийг хэрэгжүүлэхэд хүн ам, эрүүл мэндийн байгууллага эмнэлгийн тусламж үйлчилгээнд аюулгүй, чанарын баталгаатай үндэсний эмийн үйлдвэрийн бүтээгдэхүүнээр хангах ажилд нь өндөр амжилт хүсэв.
