Дэлхийн оюутны спортын XXVIII Универсиад БНСУ-ын Гванжу хотноо 2015 оны 7 дугаар сарын 3-14-ны өдрүүдэд 12 хоногийн турш амжилттай үргэлжлэн таван тивийн 137 орны 10,711 төлөөлөгчид оролцсон. Универсиад спортын 18 төрөлд болж, 272 багц медалийн төлөө өрсөлдсөн юм. “Гванжу-2015” Универсиадад Монгол Улс спортын 12 төрөлд 160 хүний бүрэлдэхүүнтэй баг тамирчдыг бэлтгэн, зохион байгуулж оролцуулсан билээ. Монголын баг тамирчид дэлхийн оюутны Универсиадаас жүдо, буудлагын спортын төрлүүдээс 2 алт, 1 мөнгө, 2 хүрэл нийт 5 медаль авч, дэлхийн 137 орноос 24 дүгээр байранд орсон амжилт үзүүлсэн юм.
Ийнхүү Дэлхийн оюутан залуучуудын эв нэгдэл, найрамдал, нөхөрлөлийн билэгдэл болсон Оюутны спортын XXVIII Универсиадад амжилттай оролцсон баг тамирчид, дасгалжуулагчдад Монгол Улсын Засгийн газар хүндэтгэл үзүүлж, спортын өндөр амжилт хүслээ.
Дэлхийн оюутны спортын наадмын жүдо бөхийн төрөлд алтан медаль хүртсэн Доржсүрэнгийн Сумъяад Засгийн газрын 2014 оны тогтоолын дагуу 30 сая төгрөг, буудлагын төрөлд алт, мөнгө, хүрэл медаль хүртсэн Энхтайваны Даваахүүд 36 сая, жүдо бөхийн төрөлд хүрэл медаль хүртсэн Мөнхбатын Уранцэцэгт 10 сая, буудлагын төрөлд мөнгө, хүрэл медаль хүртсэн Оюуны Төгөлдөр, Энхтайваны Бадамгарав нарт тус бүр зургаан сая төгрөгийн мөнгөн шагнал олгох Батламжийг гардууллаа.
