ЭМЯ-ны Төрийн нарийн бичгийн дарга Д.Очирбат Уламжлалт анагаах ухааны эмч, судлаачдын нийгэмлэгийн төлөөлөлтэй уулзлаа

ЭМЯ-ны Төрийн нарийн бичгийн дарга Д.Очирбат Уламжлалт анагаах ухааны эмч судлаачдын нийгэмлэгийн тэргүүн, Уламжлалт анагаах ухаан, технологийн хүрээлэнгийн захирал Ч.Чимэдрагчаа, тус нийгэмлэгийн хүндэт профессор, Анагаахын шинжлэх ухааны доктор, профессор Б.Дагвацэрэн нартай 2017 оны 11 дүгээр сарын 21-ний өдөр уулзав. Уулзалтанд тус яамны Төрийн захиргааны удирдлагын газрын дарга Д.Оюунчимэг, Эмнэлгийн тусламжийн газрын дарга Я.Буянжаргал, холбогдох мэргэжилтнүүд, Уламжлалт анагаах ухаан, технологийн хүрээлэнгийн эмнэлгийн дарга Д.Шинэтуяа нар байлцлаа.

            Төрийн нарийн бичгийн дарга Д.Очирбат Европын орнуудад уламжлалт анагаах ухааны чиглэлээр ажиллаж, улс орноо төдийгүй Монголын уламжлалт анагаах ухааныг сурталчилж байгаа монгол эмч нараа урамшуулах, мэргэжлийн ур чадвараа хөгжүүлэхэд дэмжлэг үзүүлэх үүднээс мэргэжлийн шалгалт авах үйл ажиллагааг Уламжлалт анагаах ухааны эмч судлаачдын нийгэмлэгээс 2 дахь удаагаа Бүгд Найрамдах Польш Улсын Варшав хотноо зохион байгуулахыг бодлогын хувьд дэмжсэн  гэдгийг дурдаад мэргэжлийн зэргийн  шалгалтанд тэнцэж, зохих шалгуурыг хангасан, Польш Улсын Варшав, Катовиц, Освецин, Вема зэрэг 10 хотод амжилттай ажиллаж байгаа дараахь 23 уламжлалт анагаах ухааны эмчийн "Мэргэжлийн зэргийн үнэмлэх"-ийг нийгэмлэгийн тэргүүн Ч.Чимэдрагчаад хүндэтгэлтэйгээр гардуулав.

            Уламжлалт анагаах ухааны эмч, судлаачдын нийгэмлэгийн тэргүүн Ч.Чимэдрагчаа уламжлалт анагаах ухааны чиглэлээр хийгдэж байгаа сүүлийн үеийн ажил, хэвлүүлсэн ном бүтээлийн талаар товч танилцуулж, "Монголын уламжлалт анагаах ухааны нэр томъёо, үг хэллэгийн толь бичиг", "Монголын уламжлалт анагаах ухаанд хэрэглэгддэг түүхий эд, эмийн фармакопей" бүтээлийг Төрийн нарийн бичгийн даргад хүлээлгэн өгсөн ба цаашид "Монголын уламжлалт анагаах ухаанд хэрэглэгддэг түүхий эд, эмийн фармакопей"-г Эрүүл мэндийн сайдын тушаалаар батлуулах зорилготой байгаагаа уламжлав.

            Уулзалтын төгсгөлд Төрийн нарийн бичгийн дарга Д.Очирбатаас Монголын уламжлалт анагаах ухааныг хөгжүүлэх талаар төрөөс баримтлах бодлогыг шинэчлэн батлах, Монголын уламжлалт анагаах ухааны үндэсний болон олон улсын хэмжээний зөвшилцөх уулзалт зохион байгуулах, уламжлалт анагаах ухааны эрдэмтэн, судлаачдын чуулга уулзалт зохион байгуулах чиглэлээр санаачилгатай ажиллаж, хэрэгжилтийг тухай бүр тайлагнахыг Эмнэлгийн тусламжийн газарт даалгалаа.