ДЭМБ-ын Номхон далайн баруун бүсийн төвийн захирал Др Шин Ён-сү Монгол улсад айлчилж байна. Тэрээр өнөөдөр Улаанбаатар хотын хүн ам олонтой Сонгинохайрхан дүүргийн Эрүүл мэндийн төв болон 14 хорооны өрхийн эмнэлэгт ажиллаж, Засгийн газрын зүгээс ДЭМБ зэрэг эрүүл мэндийн түншүүдтэй хамтран эрүүл мэндийн чанартай тусламж үйлчилгээг нийт монголчуудад хүртээмжтэй болгох зорилгоор хэрэгжүүлж байгаа үйл ажиллагаатай танилцлаа.
ДЭМБ-ын Номхон далайн баруун бүсийн төвийн захирал Др. Шин Ён-Сү энэ үеэр хэлсэн үгэндээ сүүлийн жилүүдэд ДЭМБ үндэсний болон орон нутгийн эрх бүхий байгууллагуудтай хамтран хотын захын хорооллууд, хөдөөгийн алслагдсан хүн ам, болон нүүдлийн мал аж ахуй эрхэлж буй малчин түмэндээ эрүүл мэндийн явуулын тусламж үйлчилгээг үр ашигтай үзүүлэхэд анхаарч байна. “Монгол Улс нь эрүүл мэндийн тусламж үйлчилгээг бүх нийтэд хүртээмжтэй болгох, 2030 он хүртэлх Монгол Улсын Тогтвортой хөгжлийн үзэл баримтлал болон Тогтвортой хөгжлийн зорилтуудыг хэрэгжүүлж, нүүдлийн мал аж ахуй эрхлэж буй өрхөөс эхлээд Улаанбаатар хотод шилжин суурьшигч гээд нэг ч хүнийг чанартай, хүртээмжтэй, хүлээн зөвшөөрөхүйц тусламж үйлчилгээнээс орхигдуулахгүй байх чин эрмэлзлээр дүүрэн байна” хэмээн онцоллоо.
