ДАРЬСҮРЭНГИЙН НЯМ-ОСОР (1928-2017)
Монгол Улсын Эрүүлийг Хамгаалахын Гавьяат Ажилтан, Бүгд Найрамдах Монгол Ард Улсын Эрүүлийг Хамгаалах Яамны Сайд асан Дарьсүрэнгийн Ням-Осор 2017 оны 8-р сарын 29-нд таалал төгссөж бидэнд гүн их гарз тохиолоо.
Дарьсүрэнгийн Ням-Осор 1928 онд Хөвсгөл аймгийн Улаан-Уул суманд мэндэлж. 1939-1945 онд Рэнчинлхүмбэ сумын бага сургууль, Хүн эмнэлгийн техникумд суралцаж, 1949-1954 онд ЗХУ-ын Москва хотод Эм зүйн дээд сургууль төгссөн Монголын анхны мэргэжлийн эм зүйч байлаа.
Тэрээр ажил амьдралынхаа гарааг 1945-1946 онд Хөвсгөл аймгийн Хатгал хотын аптект эм найруулагч,1946-1948 онд Чойбалсан аймгийн эмийн сангийн эрхлэгч, 1949-1954 онд Улсын эм бэлтгэлийн газарт эмийн сангуудын асуудал эрхэлсэн байцаагч,1954-1962 онд Эмийн Заводын дарга, ерөнхий инженер, лабораторийн эрхлэгч, 1962-1973 онд Улсын эм, хангамж үйлдвэрлэлийн газрын дарга, 1973 оны 2 дугаар сараас 5 дугаар сар хүртэл Эрүүлийг Хамгаалах яамны 1 дүгээр орлогч сайд, 1973 оны 5 дугаар сараас 1986 оныг хүртэл БНМАУ-ын Эрүүлийг хамгаалах яамны сайд, 1986-1991 онд Анагаах ухааны хүрээлэнгийн эм зүйн секторын эрхлэгч, эрдэм шинжилгээний тэргүүний ажилтнаар ажиллаж байгаад тэтгэвэрт гарсан юм.
Д.Ням-Осор нь Эрүүлийг Хамгаалах Яамны Сайдаар ажиллахдаа хүн амд үзүүлэх нарийн мэргэжлийн тусламжийг сайжруулах, оношлогоо шинжилгээний тоног төхөөрөмжийг нэмэгдүүлэх, эмийн сангуудын удирдлага, хяналтыг боловсронгуй болгох, ажил үйлчилгээний чанарыг дээшлүүлэх, эмч, эмийн мэргэжилтний хөдөлмөрийг үнэлэх зэрэгт ихээхэн анхаарч, Улсын III-р төв эмнэлэг, Хавдар судлалын үндэсний төв, Халдварт өвчин судлалын үндэсний төв, Эх хүүхдийн эрүүл мэндийн үндэсний төв, нийслэлийн дүүргийн хүүхдийн эмнэлэг, поликлиник зэрэг 160 гаруй эмнэлгийн барилгыг төв, хөдөөгийн эрүүл мэндийн байгууллагын зориулалтаар ашиглалтад оруулахад хүчин зүтгэл гаргаж эмнэлгийн тусламж үйлчилгээг хөгжүүлэхэд онцгой гавьяа байгуулсан бөгөөд түүний бүтээн байгуулсан эрүүл мэндийн байгууламжууд нь Монгол улсын 20-р зууны нийгмийн хөгжлийн тод гэрч, манай ахмад үеийнхний улс орноо хөгжүүлэх гэсэн зүтгэл, тэмүүллийн илрэл болон үлдсэн юм.
Манай улсын эмийн томоохон мэргэжилтэн, эрүүл мэндийн салбарын ахмад удирдах ажилтан, эрдэмтэн түүний гавьяаг өндөрөөр үнэлж Хөдөлмөрийн гавъяаны улаан тугийн одон, “Алтан гадас” одон, Хөдөлмөрийн хүндэт медаль, ойн хүндэт медалиуд, Болгарын Георгий Дмитровын медалиар шагнажээ.
Дарьсүрэнгийн Ням-Осорын Монголын Эрүүл мэндийн салбарт бүтээсэн гавъяа зүтгэлийг Монголын ард түмэн үүрд дурсан санах болно. Үр хүүхэд, ач зээ, ах дүү, төрөл төрөгсөд, ойр дотны нөхөдөд нь гүн эмгэнэл илэрхийлье
Монгол улсын Эрүүл мэндийн яам,
Эрүүл мэндийн сайд А. Цогцэцэг
Эрүүл мэндийн дэд сайд Л.Бямбасүрэн
Төрийн нарийн бичгийн дарга Д.Очирбат
БНМАУ-ын гавьяат багш, АУ-ны доктор, профессор Г.Жамба
ЭХ-ын гавьяат ажилтан, Академич, АШУ-ны доктор, профессор П.Нямдаваа
МУ-ын гавьяат багш, Академич, Эм зүйн шинжлэх ухааны доктор, профессор Д.Дүнгэрдорж
Төрийн соёрхолт, ЭХ-ын гавьяат ажилтан, Эм зүйн ухааны доктор, профессор Л.Хүрэлбаатар
ЭХ-ын гавьяат ажилтан, Эм зүйн ухааны доктор А.Ламжав
Эм зүйн шинжлэх ухааны доктор, профессор Д.Цэндээхүү
Эм зүйн ухааны доктор, профессор С.Цэцэгмаа
