Анагаахын Шинжлэх Ухааны Үндэсний Их Сургуулийн эмч, эмнэлгийн мэргэжилтэн болохоор хичээн суралцаж байгаа нийгмийн идэвх зүтгэлтэй, сурлага амжилтаараа бусдыгаа манлайлсан 40 оюутанд Эрүүл мэндийн сайд өнөөдөр тэтгэлэг гардууллаа.
Энэхүү тэтгэлгийн онцлог нь бусдыгаа манлайлан суралцаж буй оюутнуудын маань аав, ээж, өвөө, эмээ, гэр бүлийн гишүүд нь эмнэлгийн салбарт ажиллаж байгаа болон насаараа ажиллан тэтгэвэрт гарсан, эрүүл мэндийн салбарт хувь нэмрээ оруулсан хүний хүүхдүүд байна гэж заасан бөгөөд нэг оюутанд 500,000 төгрөгийн тэтгэлгийг гардуулан өгчээ.
Тэтгэлэг гардуулах ёслолын үйл ажиллагаанд Эрүүл мэндийн сайд А.Цогцэцэг, ЭМЯ-ны Төрийн захиргааны удирдлагын газрын дарга Д.Оюунчимэг, Дэлхийн эрүүл мэндийн байгууллагын суурин төлөөлөгч Су Ньюнт У, АШУҮИС-ийн захирал Г.Батбаатар болон АШУҮИС-ийн удирдлагууд, багш, ажилчид, оюутан залуучууд оролцлоо.
Энэхүү тэтгэлэг нь оюутнуудын сурах эрмэлзлийг улам нэмэгдүүлж, улмаар эрүүл мэндийн салбарын чадварлаг мэргэжилтэн болж төлөвшихөд чухал нөлөө үзүүлэх юм.
