Монгол улсын Шадар сайд, газар хөдлөлтийн гамшгаас урьдчилан сэргийлэх байнгын ажиллагаатай зөвлөлийн даргын 2016 оны 01 дүгээр тушаалаар байгуулагдсан ажлын хэсгийн хурал болов. Уг ажлын хэсэг нь эмнэлгийн барилгад эрсдэлийн үнэлгээ хийх аргачлал, газар хөдлөлтийн гамшгийн эрсдэлийг давах чадвар бүхий эмнэлгийн барилгын стандартыг боловсруулах зорилготой байгуулагдсан юм.
Ажлын хэсгийн хурлыг Эрүүл мэндийн яамны Төрийн нарийн бичгийн дарга Д.Очирбат удирдан зохион байгуулав. Барилга хот байгуулалтын яам, Онцгой байдлын ерөнхий газар, Мэргэжлийн хяналтын ерөнхий газар, Нийслэлийн Эрүүл мэндийн газар, Нийслэлийн Ерөнхий төлөвлөгөөний газар зэрэг байгууллагуудын төлөөлөл оролцлоо. Хурлаар эрүүл мэндийн барилга, байгууламжийн газар хөдлөлтийн тэсвэртэй байдлын үнэлгээ, хийгдэж байгаа ажлын талаар Барилга, хот байгуулалтын яам, мэргэжлийн ерөнхий хяналтын газрын мэдээлэл, мөн барилгын норм, норматив, дүрмүүд, барилгын хяналтын хуудсыг ашиглан дэмжлэгт хяналт хэрхэн явуулж байгаа талаар мэдээллийг тус тус ярилцав. Мөн түүнчлэн ДЭМБ – ын эмнэлгийн барилга, байгууламжийг газар хөдлөлтийн гамшгийн үед нурахааргүй бат бөх барих санаачлага -“Аюулгүй эмнэлэг”- ийн бодлогын хүрээнд уг байгууллагаас гаргасан эмнэлгийн үнэлгээний хяналтын хуудасны хэлэлцэн өөрийн орны нөхцөлд тохируулан боловсруулж хэрэглэх боломжтой гэж ажлын хэсгийн гишүүд шийдвэрлэв.
