Санте Сюд францын ТББ 1994 оноос хойш МУ-ын эрүүл мэнд, нийгмийн салбарт төсөл хэрэгжүүлсээр ирсэн. Тус төрийн бус байгууллагын Монгол дахь төслийн зохицуулагч Ц. Бөхөөг Эрүүл мэндийн сайд А.Цогцэцэг өнөөдөр хүлээн авч уулзаж ярилцлаа.
Өнгөрсөн хугацаанд ЭМЯ, Сэлэнгэ, Архангай аймгийн ЭМГ-уудтай хамтран бүх шатны эрүүл мэндийн байгууллагад хамт олны оролцоонд түшиглэсэн байгууллагын хөгжлийн төсөл боловруулах арга зүйг нэвтрүүлж, хүний нөөцийг чадавхижуулах, цахим сүлжээг үүсгэх, нэн тэргүүнд шаардлагатай тоног төхөөрөмжөөр хангах ажлуудыг хийсэн байна.
2016 оноос үндэсний түвшинд эх баригч нарын мэргэжил, ур чадварыг бэхжүүлэх төсөл, мөн Архангай аймгийн Хашаат, Чулуут сумын эрүүл мэндийн төвд Эрүүл мэнд-Хоол тэжээл төслийг Жэрэс францын ТББ-тай хамтран хэрэгжүүлж байна.
Эх баригчийн мэргэжил, ур чадварыг бэхжүүлэх төслийн хүрээнд сургалт, эрх зүйн орчин, мэргэжлийн ажил байдлын өнөөгийн түвшнийг тодорхойлох үндэсний хэмжээний үнэлгээ хийгдсэн байна. Цаашид БНФУ-ын эх барихын тусламж үйлчилгээ, хууль эрх зүйн орчинтой танилцаж судлах, улмаар төгсөлтийн өмнө болон дараах сургалтын хөтөлбөр, холбогдох бусад баримт бичигт шаардлагатай нэмэлт өөрчлөлт санал болгох, мөн Монголын эх баригч бага эмч нарын нийгэмлэгийг чадавхижуулах ажлуудыг хийхээр төлөвлөснөө сайдад танилцууллаа.
Эрүүл мэнд-Хоол тэжээлийн төслийн хүрээнд дурдсан ЭМТ-үүдэд нарны эрчим хүчээр ажиллах хүлэмжийг барьж хүлээлгэн өгсөн бөгөөд, хүнсний ногооны нэр төрлийг олшруулах, эрүүл зохистой хүнсний хэрэглээг дэлгэрүүлэх, нийгмийн эрүүл мэндийн мэдээлэл сурталчилгааг сайжруулах, цаашлаад салбар хоорондын хамтын ажиллагааг бэхжүүлж, үндэсний хөтөлбөрийн хэрэгжилтэнд дэмжлэг үзүүлэх зорилготой аж. Төслүүдийн санхүүгийн хамтрагч талууд нь Францын Санофи Эспуар Сан, Монакогийн Гадаад Хамтын Ажиллагааны Газар юм.
