Эрүүл мэндийн сайд А.Цогцэцэг Дэлхийн эрүүл мэндийн байгууллагын Номхон далайн баруун бүсийн Халдварт өвчний газрын дарга Др. Марк Жэкобс-г өнөөдөр хүлээн авч уулзаж ярилцлаа. Уулзалтын эхэнд Др. Марк Жэкобс ДЭМБ-ын Номхон далайн баруун бүсийн үйл ажиллагаа болон өөрийн айлчлалын зорилгын талаар товч танилцуулсан юм.
Уулзалтын үеэр Эрүүл мэндийн сайд А.Цогцэцэг “Манай орны хувьд сүрьеэ, бэлгийн замаар дамжих халдвар, вирүст хепатит, зоонозын халдвар зэрэг халдварт өвчнүүд нэмэгдэж, нийгмийн эрүүл мэндийн тулгамдсан асуудал болж байгааг дурдаад ялангуяа төрөлхийн тэмбүү, олон эмэнд тэсвэртэй сүрьеэ, эмнэлгийн ажилтнуудын дунд сүрьеэгийн халдвар өндөр байгаа нь санаа зовоож байгааг” онцоллоо. Иймд эдгээр чиглэлээр ДЭМБ-ын Номхон далайн баруун бүсийн Халдварт өвчний газартай хамтран ажиллах, техникийн туслалцаа авах хүсэлтэй байгаагаа илэрхийллээ.
Др. Марк Жэкобс Эрүүл мэндийн сайдад мэдээлэл өгсөнд талархал илэрхийлээд Монгол Улсын Засгийн газраас хэрэгжүүлж буй вирүст хепатиттай тэмцэх, урьдчилан сэргийлэх төсөл, хөтөлбөрүүд, энэ чиглэлээр анхаарал хандуулан ажиллаж байгаа нь бүсийн бусад орнуудад үлгэр жишээ болж байгаа хэмээгээд халдварт өвчинтэй тэмцэхэд салбар хоорондын хамтын ажиллагаа болон ард иргэдтэй хамтран ажиллах нь чухал бөгөөд тавьсан хүсэлтийг шийдвэрлэх талаар бүсээс анхаарч ажиллана гэдгээ илэрхийллээ.
