Өнөөдөр ЭМЯ-нд “Шинэ болон сэргэн тархаж буй халдварт өвчин”-ий талаар эмч, мэргэжилтнүүдэд зориулсан интерактив хичээлийн нээлтийн үйл ажиллагаа боллоо. Хичээлийг Монголын талбарын тархвар судлалын сургалтын холбоо ТББ, Халдварт өвчин судлалын үндэсний төв, Зоонозын өвчин судлалын үндэсний төв, Нийгмийн эрүүл мэндийн хүрээлэн хамтран ДЭМБ-ын техникийн болон санхүүгийн дэмжлэгтэйгээр бүтээлээ.
Уг интерактив хичээл үндсэн 7 бүлэгтэй, бүлэг тус бүр нь анимейшн болон видео, 690 гаруй слайд бүхий англи, монгол илтгэл, 350 орчим хуудас дэлгэрэнгүй унших материал, 7 төрлийн ном, ДЭМБ-ын гарын авлага, 21 төрлийн инфографик, 6 төрлийн өвчнөөс сэргийлэх анимейшн, видеог багтаасан.
Хичээлийн онцлог нь шинэ болон сэргэн тархаж буй халдварт өвчний дэгдэлт, онцгой байдал үүсэхэд хэрэглэх мэдлэг, дадлын суурь багц материалыг багтаасан бөгөөд тандалт, тархвар зүйн судалгаа, эрсдлийн үнэлгээ, хариу арга хэмжээ, дэгдэлтийн судалгаа, эрсдлийн харилцаа холбоо, тоон мэдээний дүн шинжилгээ хийх бүхий л аргуудыг оруулжээ.
Уг хичээл нь нийгмийн эрүүл мэндийн чиглэлээр үйл ажиллагаа явуулдаг олон салбарын мэргэжилтнүүдийн хүртээл болж, ашиглагдах боломжтой юм.
