Эрүүл мэндийн сайд А.Цогцэцэг Дэлхийн эрүүл мэндийн байгууллагын Монгол дахь суурин төлөөлөгч Доктор Су Нюунт-У-г өнөөдөр хүлээн авч уулзаж ярилцлаа. Уулзалтын эхэнд Доктор Су Нюунт-У Эрүүл мэндийн сайдын хариуцлагатай албан тушаалд томилогдсонд нь баяр хүргээд сүүлийн дөрвөн жил хийж гүйцэтгэсэн ажлын талаар товч танилцуулсан юм.
Уулзалтын үеэр Эрүүл мэндийн сайд А.Цогцэцэг сайдаар ажиллах хугацаандаа “Нийгмийн эрүүл мэндийг хөгжүүлэх, сэргийлж болох өвчнөөс урьдчилан сэргийлэх, эх хүүхдийн эрүүл мэнд, эрүүл мэндийн тусламж үйлчилгээний санхүүжилтийн тогтолцоо, эрүүл мэндийн даатгал, эрүүл мэндийн мэдээллийн тогтолцоог хөгжүүлэх, тухайлбал телемедицин, зөөврийн эрүүл мэндийн технологийг нэвтрүүлэх, хөгжүүлэх” асуудлууд дээр анхаарал хандуулан ажиллахаа илэрхийллээ.
Мөн эрүүл мэндийн салбарыг хөгжүүлэхэд бусад яамд, төрийн байгууллагууд, олон улсын байгууллагууд, мэргэжлийн салбар зөвлөл, нийгэмлэгүүд, төрийн бус байгууллагуудтай нягт хамтран ажиллах болно хэмээгээд ДЭМБ-ын хамтын ажиллагааны стратегийг шинэ Засгийн газрын мөрийн хөтөлбөртэй уялдуулж боловсруулах гэж байгаад баяртай байгаагаа илэрхийллээ.
