ОХУ-ын Саха Улсад зохион байгуулагдаж байгаа “Азийн хүүхдүүд-2016” Олон улсын хүүхдийн спортын наадмын хүрээнд зохион байгуулагдаж буй Олон улсын эрдэм шинжилгээний хурал өнөөдөр Якутск хотноо боллоо. Эрдэм шинжилгээний хуралд Монгол Улсын баг тамирчдын ахлагч, Эрүүл мэнд, спортын сайд С.Ламбаа оролцож, илтгэл тавив.
Сайд илтгэлдээ “Азийн хүүхдүүд” наадмын үр өгөөж Монгол улсад хэрхэн нөлөөлсөн талаар онцолж, Монгол улс 2020 онд энэхүү наадмыг өөрийн улсад зохион байгуулахаар зорьж байгаа талаар түүнчлэн спортын томоохон арга хэмжээ хувь хүнийг төлөвшүүлэх, эрүүлжүүлэхэд чухал үүрэг гүйцэтгэдэг төдийгүй улс орны нийгэм-эдийн засгийн хөгжилд том үүрэгтэй байдаг гэдгийг ОХУ-ын Саха улсын хүүхдийн наадам хийсэн 20 жилийн түүхээс харж байна хэмээн тэмдэглэсэн байна.
Мөн дээрх эрдэм шинжилгээний хуралд Үндэсний биеийн тамирын дээд сургуулийн захирал, Шинжлэх ухааны доктор, профессор Л.Алтанцэцэг "Монгол хүүхдүүдийн хөдөлгөөний эвслийг харьцуулан судалсан нь" сэдэвт хамтарсан илтгэлээ хэлэлцүүлж оролцож байна.
